3Fko ikasleek Kahami eta Mafara izena aukeratu zuten beraiek sortutako jatetxearen izen gisa. Ekimen hau taldeak sukaldaritza ikasgaian ikasitakoa azalerazteko interesetik sortu zen.
Ikasturte honetan zehar prestatu dituzten errezeta guztietatik batzuk aukeratu zituzten dastatze menua diseinatzeko, hala nola, chaufa arroza, bacalao a Brás, blinis edota larrosa tarta. Menu honetako platerek modu batean edo bestean ikasleen jatorria ordezkatzen dute. Horrez gain, janzkeraz, erosketak egiteaz eta jatetxea apaintzeaz ere arduratu ziren ikasle hauek eta egun handiko rolak nola banatuko zituzten adostu zituzten.
Dena prest zegoen baina bezeroak falta zitzaizkien. Nola aukeratu horiek ikastetxe honetako pertsona guztien artean? Lan hau kahoot bidez egin zuten; horretarako 20 galdera egin zituzten elikadurarekin, errezetekin eta sukaldaritzako protokoloekin lotuta eta ikastetxeko langileei eman zieten parte hartzeko aukera. Azkenik 6 langile izan ziren hautatuak esperientzia honetaz disfrutatzeko.