2026ko apirilaren 15ean eta 16an VII. Memoriaren Belaunaldien arteko Topaketa egin zen Sartagudako Memoriaren Parkean. Nafarroako Bigarren Hezkuntzako hainbat ikastetxetako ia mila ikasle elkartu ziren 1936ko uztaileko estatu-kolpearen ondoren eraildakoen senideekin. Bertan, kolpe horren ondoren sortu zen errepresioaren ondorioak bertatik bertara ezagutu ahal izan zituzten.
Mendillorri BHIko D ereduko Nafarroako Historia eta eredu guztietako DBHko 4. mailako ikasleak joan ziren ekitaldira apirilaren 16an, osteguna, Tuterako Benjamin BHI, Lodosako Pablo Sarasate BHI, Zizur BHI, Martzillako Villena BHI eta Agoitz DBHIko ikasleekin batera.
Eskema antzekoa izan zen bi jardunaldietan. Hala, Nafarroako Memoriaren Institutuko kideek ekitaldiaren aurkezpen laburra egin ondoren, ikasleak taldeetan bildu ziren biktimekin, beren esperientzia kontatuz eta oroimenaren garrantziari eta belaunaldi berriei helarazteari buruzko gogoeta eginez. Ikasleek aktiboki parte hartu zuten, eta oso elkarrizketa aberasgarria sortu zen.
Ondoren, sorkuntza plastikoko tailer bat egin zen Taxio Ardanaz artistarekin, eta gainerakoek Memoriaren Paque bisitaldi gidatu batean parte hartu genuen.
Tailerrak amaitu ondoren, amaierako ekitaldia egin zen Parkeko plazan, bertaratutako ikasleak protagonista dituzten hainbat jarduerarekin. DBHko 4. mailako ikasleek Berri Txarrak taldearen “Maravillas” abestia jo zuten euskaraz, eta Batxilergoko 1. mailako hiru ikaslek amaiera eman zieten ekitaldiei, errepresaliatuen harresiaren eta jardunaldian parte hartu zuten senideen aurrean aurreskua dantzatuz. Dena esan behar da, bi ekintzak bikain burutu zituzten, ekitaldian zeuden pertsona guztien txaloak jasoz.
